2Cor 10 | GAM | STEP | Una pende embe djinj, Pol nono boll moi ge une kandja kosill dje nono awi. Ba alla une ellke molo pepa bolo kandja dongall dje nono aundo we djinj. Djinj ge krais yene molo kal woro, kiye dje yei mal na embe molo kandja dje ye aundo,

2 Corinthians 10

Pol kogo yendo ge una man dje kal worbon dje yemaka une dje yem woro aundo

1 Una pende embe djinj, Pol nono boll moi ge une kandja kosill dje nono awi. Ba alla une ellke molo pepa bolo kandja dongall dje nono aundo we djinj. Djinj ge krais yene molo kal woro, kiye dje yei mal na embe molo kandja dje ye aundo, 2 djinj ge ye napiye. No makimb una singare yenj mal wanmormon we djinj ge na kandja dongall dje auno dje pro. Ba ye yeneke na ye boll wo moll dal, kandja dongall dje auno dje nayeno. 3 No makimb al wanmormon ba kunda yenmon ge una makimb una kunda yenj mal embe nayenmon. 4 Kunda wal abirmon ge makimb una abir mal embe nabirmon. God yembe dongall pai wal amblo kunda yem una gull dongall paro ge to kal worbon kune yendo. 5 Iwa pla mor ge, una God pille kane ye djine dje pille kandja kende dje kond tugo awinj. Ba djinj ge no to kal wormonaka, una nomane porapora paro ge kaye to worbonaka, Krais nomane paro mal pille karkar yene. 6 Ye Krais boll karkar yene kune yei dal, una kandja to worne una moye ge, no wo tambon. 7 Ye gaklene beto kaninj. No Krais boll mormon we djinj ge kanpol to molo djine. Ye Krais boll mor mal ge no para Krais boll mormon. 8 Iwa Kerman yene yembe i na awi ge ye pak tano dje pille awi. Ye una dongall molo, yage kal to djine dje pille na awi. Awi kogo yenmon mal ge na dje pla wordo dje kanne ba, na ngandjill nagoyo. 9 Pol no kand gopon dje pepa bolo aundo we dje piye ba na nomana embe naparo. 10 Una pende kandja embe djinj, Pol pepa bolo aundo ge kandja dongall dje aundo. Ba une nono boll moro ge une kosill mal molo una kerman kandja djinj mal embe nadjindo we djinj. 11 Ba djinj ge kanpol to molo djine. No ellke molo kandja pepa al bolo aunmon mal embe ge, no manda wo singare taimane yembon.

12 Ga yenekne no wopake mormon we djinj ge na kambono mor mal embe moro we djino ge kand goro. Ga singare paro mal yenekne kane djinj. Yenekne yenj mal pille djinj. Embe yenj ge wal pille kane nayenj.

13 Ba no kandjine amblo pla wormon mal ge, no God awi kogo ge pille no kandjine amblo pla wormon, kogo ta man. God no kogo awi yenmon ge ye po, ye Korin una ulle al moi al ge pupin. 14 Ye ulle al moi ge no asamoll wo ye Krais kandjiyembe dje aupin. Ge pille no ye kantau yenmon we dje una aupin ge no pai mal djipin kapak to nadjipin. 15 Alla una djell God kogoye yene mal no kunumb i kogo embe yepin we nadjinmon, man. Ye pillgi dongall pandaka no ye mor al kogo yenmon ge wo er kerman punda dje yenmon. 16 Ye pillgi dongall pai dal, no una djell ellke ye mopine to mor al po Jisas kandjiyembe dje aumbon kune yenda. Una kogo asa nayei al bon. Una kogo asa yei al no kunumb i no yepin we nadjimbon. 17 Baibel kandja embe bolo wori pai,

una yenekne kandjine amblo pla naworne. Iwa Kerman God kogo yei al amblo pla worne we dji. (Jer 9:24)
18 Una ta yene pille na kogo wopake yell we dji dal, God nale al kune nayenda. Ba alla God iwa ge pille ni kogo wopake yen we djinda ge iwa ge wopake moya.